 |
बागलुङ, २ मंसिर/राष्ट्रिय योजना आयोग र समाजकल्याण परिषदले तोकेका सूचक पूर्ण रुपमा पुरा गरेर जिल्लाका दुई गैरसरकारी संस्थाले उत्कृष्ठ पुरस्कार पाएका छन् । तोकिएका ४ विषयका दर्जनौं सूचकमा उत्कृष्ठ भएपछि बागलुङमा मुख्य कार्यालय भएर विभिन्न ६ जिल्लामा कार्यरत चारतारे युवा क्लब (सिवाइसी) नेपाल र धौलागिरी अञ्चलमा कार्यरत आमा मिलन केन्द्रले १० हजार नगद र प्रमाणपत्र पाएका हुन् । क्लबले बागलुङसहित पाल्पा, गुल्मी, अर्घाखाँची, लमजुङ र तनहुँ जिल्लामा पुगेर १६ शाखामार्फत लघुवित्त लगायतको काम गर्दै आएको छ । त्यस्तै केन्द्रले एचआइभी संक्रमित भएकाहरुको उपचार, काउन्सिलिङ र आयआर्जनको क्षेत्रमा काम गर्दै आएको छ ।
जिविसका योजना अनुगमन तथा प्रशासकीय अधिकृत इश्वरलाल शाक्यले बुधवार एक कार्यक्रमका विच क्लबका अध्यक्ष चण्डीप्रसाद शर्मा र केन्द्रकी अध्यक्ष ज्ञानु थापालाई नगद पुरस्कारसहित प्रमाणपत्र हस्तान्तरण गरे । आयोग र परिषदले आन्तरिक सुशासन, पारदर्शीता, लेखा प्रणाली, कामको प्रकृति, बैठक, साधारणसभा, निर्णय कार्यान्वयन, परियोजना अनुगमन र सरोकारवालाको सहभागिता लगायतका विषयमा उत्कृष्ठ छनौट गरेको हो । जिल्लामा गैसस महासंघ, जिविस र प्रशासनका अधिकृत सहभागि सिफारिस समूह र केन्द्रमा आयोग, परिषद र महासंघको टिमले अनुगमन तथा मूल्यांकन गरेर अन्तिम नामाबली प्रकाशित गरेको अध्यक्ष प्रमानन्द कंडेलले बताए । महासंघमा जिल्लाका ४२ गैसस सहभागि छन् । जिल्ला तहको सिफारिस समितिले सिफारिस गरेपछि केन्द्र तहको राष्ट्रिय योजना आयोग, समाजकल्याण परिषद र गैसस महासंघको केन्द्रीय समितिले ती संस्थाको फाइल अध्ययन गरेको थियो । साथै उनीहरुले जिल्लामा आएर पनि सम्बन्धीत संस्थाको वास्तविकता बुझेर पुरस्कारका लागि छनौट गरेको हो । पुरस्कार वितरण समारोहमा शाक्यले जिविसले गैरसरकारी संस्थालाइ नियमन गरेर समाज विकासको लागि लगाएपनि उनीहरुको कामले समाजमा छुट्टै पहिचान कायम गर्न सकेको बताए । राम्रो काम गरेकै कारण पुरस्कृत भएकोले जनताको सहयोगीको रुपमा अझै सफलतामा पुग्न उनले शुभकामना पनि दिए । गैसस महासंघ बागलुङका अध्यक्ष प्रमानन्द कंडेलको अध्यक्षता, सचिव बैकुण्ड सापकोटाको संचालन र उपाध्यक्ष पुनम शर्माको स्वागतमा सम्पन्न कार्यक्रममा पुनरावेदन वार इकाइका अध्यक्ष कृष्णप्रसाद निउरे, पुरस्कृत संस्थाका तर्फबाट चण्डीप्रसाद शर्मा र ज्ञानु थापा तथा पत्रकार महासंघका अध्यक्ष मुकेशचन्द्र राजभण्डारीले शुभकामना व्यक्त गरेका थिए । यसैविच केन्द्रीय महाधिवेसनका लागि महासंघले केन्द्रीय प्रतिनिधिहरु पनि छनौट गरेको छ । प्रतिनिधिमा आमा मिलन केन्द्रकी अध्यक्ष ज्ञानु थापा, धौलागिरी सामुदायिक श्रोत विकास केन्द्रका अध्यक्ष इश्वरलाल राजभण्डारी, भीमापोखरा युवा क्लबका अध्यक्ष अमरबहादुर थापा, दिपज्योती युवा क्लबका सचिव तेजप्रसाद शर्मा, गाजा युवा क्लबका रेशम नेपाली, स्वयंशक्ति नेपालका अध्यक्ष बैकुण्ठ सापकोटा, तमान युवा क्लबका जोकलाल बुढा, परिवर्तनका लागि प्रतिवद्धताबाट संगीता शर्मा र आत्मनिर्भर सामुदायिक संस्थाकी सीता शर्मा छनौट भएका हुन् ।
